Barbón reclama "unión y osadía" ante los retos pendientes, como'l del financiamientu

El presidente afita que'l 8 de setiembre apéllanos ensin distinción d'ideoloxíes nin credos

El presidente del Principáu, Adrián Barbón, reclamó "unión y osadía" pa encarar los desafíos que tien per delantre la comunidá, ente ellos el del financiamientu autonómicu, una cuestión na que, según el xefe del Executivu asturianu, "la rotundidá nun se demuestra con voces nin esparabanes, sinón con razones sólides, bien argumentaes y firmeza sele".

"Asturies gana cuando encara xunida los desafíos del futuru, cuando nun vuelve la cara ante los problemes y reafítase con atrevimientu y enfotu pa superar les sos metes, por alloñaes que paezan", señaló nel mensaxe institucional que, por mor del Día d'Asturies, dirixó a la ciudadanía dende la Universidá Llaboral de Xixón, un espaciu que'l so gobiernu quier que seya reconocíu como patrimoniu de la humanidá.

Pa Barbón, que tuvo palabres d'alcordanza pa los dos trabayadores muertos esti xueves nun accidente llaboral nel cai d'El Musel, esi ye'l sentíu de la celebración del Día d'Asturies, una xornada que refuerza l'arguyu de pertenencia y apella a "trabayar costazu con costazu na construcción del meyor porvenir".